逐个好，我是雅玲，真歡喜有機會來和逐个分享：我家己佇母語育囝過程內底受著Adler啟發佮幫助的故事。

自本我是教英語的國中教師，生囡仔了後，智覺著母語真重要。想想咧，台灣無欠我一个英語老師，毋過，真需要有人繼續共母語湠落去。我的母語是我佮我的親人上深的連結，是我會當共我的阿媽永遠記佇心肝底的方式。

自按呢，我決心欲好好仔共我的母語--台語抾轉來，佇日常生活大量使用。而且，我希望我的囡仔佮我仝款，成做一个自細漢講台語大漢的人。

佇這个中文真強勢的社會，欲用母語育囝毋是真簡單的代誌。佳哉，佇我有身的時陣，就接觸著「阿德勒心理學」。

阿德勒對人的信任予我真感動，伊對人的鼓勵嘛予我真大的勇氣。

育囝這條路，阿德勒共我鬥相共誠濟，我心內真感恩。

阿德勒對我目前咧推廣本土語言、教台語，嘛真有幫贊。我常在用溫和佮堅定的態度，去鼓勵我的學生和聽眾，in上了我的課，真濟人攏會注意著「寶惜家己的語言佮文化」是真要緊的代誌，主動提出行動去改變。

這款正面的推廣方式，尊重個人的想法和決定，袂予人傷過有壓力，我感覺真好。

這場分享會，我真希望予來聽的人會當體會著這款「共好」的感覺；無論未來心內有啥物想法想欲和人分享，攏會當試看覓喔。